Alredor de 13 mil persones firmaron en menos de 24 hores una pitición a la Casa Blanca pa que deportara al cantante canadiense Justin Bieber, que ta en llibertá baxo fianza dende’l xueves por conducir a velocidá escesiva y baxo los efectos del alcohol y otres sustancies en Miami.

L’asociación We The People (Nosotros El Pueblu), que fai referencia nel nome al entamu del preámbulu de la Constitución de los Estaos Xuníos, funciona dende 2011 como ferramienta del Gobiernu pa mostrase abiertu a la opinión de los ciudadanos. Asina, un equipu de la Casa Blanca estudia les peticiones qu’axunten el númberu necesariu de firmes (esta necesita 86 mil pal 22 de febreru) y cumplen coles normes, pa depués decidir qué muérganu da una respuesta oficial a la reclamación.

L’arrestu’l xueves de Bieber xeneró un gran alderique nel país sobre sí, nes mesmes condiciones, otru inmigrante como él, llegal o non, sedría deportáu o non d’esmenu al so país d’orixen.

La detención en Miami fuera’l gotu qu’apinara’l vasu, pero l’asuntu que más amenaza l’estatus migratoriu del cantante nun ye la conducción n’estáu d’ebriedá sinon el casu de vandalismu pol que ta siendo investigáu.