Pal que nun tenga plan de qué facer el 1 d’avientu, el Parque de la Prehestoria prepara una actividá qu’inclúi amagüestu, taller de fueu y un cooking show (un taller de cocina con frutos de la seronda). Una actividá dirixida a tola familia, na que se xunta la receta tradicional del amagüestu con otres rellacionaes colos productos del entornu.

El programa entamará a les 10:30h cola llegada al Parque de la Prehestoria, previa reserva, y visita llibre a la galería, onde se va descubrir la vida cotidiana de los moradores del llugar: cómo vivíen, cómo cazaben, cómo pintaben… De siguío fadráse un percorríu pela Cueva de Cueves, pa descubrir les reproducciones a escala real de tres fragmentos de les cueves del Camarín de la Peña de Candamu, de Tito Bustillo en Ribeseya y de la cueva de Niaux en Francia.

A partir de mediu día fadráse una gueta de castañes, na fastera de viesca del Parque, pa siguir col taller de fueu y el taller de cocina dirixíu pol cocineru asturianu Sergio Rama, col que se va presenciar la ellaboración de dellos platos, asina como sentir conseyos sobre como incorporar una dieta elemental y avezase a comer saludable.

P’aportar al Parque de la Prehestoria tien de dirixise a Teberga y tomar la carretera del puertu Ventana. La desviación gárrase nel mesmu pueblu de Samartín, llugar nel que s’afaya la Casa Conceyu.