Va mediu sieglu, la tarde-nueche del 10 al 11 d’ochobre de 1963, morría na so casa de la Pronveza francesa’l gran mitu de la “chanson”, Edith Piaf. Al so entierru, una verdadera manifestación de duelu popular, asistieron alredor de 50 mil persones. Los cantares qu’ella popularizó y la hestoria de la so vida, valieron con banda sonora y película de la hestoria de mediaos del sieglu XX. Una banda sonora que sigue formando parte de la nuestra memoria collectiva, con cantares como “Je ne regrette rien” (Nun m’arrepiento de nada), “La vie en rose” (La vida en rosa), “Hymne a l’amour” (Himnu al amor), “Mon dieu” (Dios míu) o “Milord” (Señor).

Nacida en París en 1915, la so vida tuvo marcada pola desdicha dende la so más tienra infancia, lo qu’acabó exerciendo una influencia decisiva sobre’l so estilu interpretativu, líricu y gesgarráu al mesmu tiempu. El so aspectu desamparáu valió-y el nome pol qu’universalmente se la va conocer: Piaf (pardal). El so nome verdaderu fuera Edith Giovanna Gassion.

Fía d’un contorsionista acróbata y d’una cantante de cabaret, la so infancia fue triste, Los sos padres separáronse aína; la madre, alcoholizada y enferma, dexó la custodia d’Edith al home (tamién alcohólicu) y a la so güela paterna. Dada la precaria situación económica de la familia, Edith tenía que ganase unes monedes cantando nes casi y cafés de París.

La so vida cambió cuando, cantando na cai, un traseunte mui elegante aparó a sentila. Esti home resultó ser Louis Leplée, propietariu del cabaret Gerny’s, ún de los más conocíos de París. Con too, la so consagración llegó tres de la segunda guerra mundial cuando se convirtió na musa de poetes ya intelectuales del París existencialista y ganó l’almiración incondicional del públicu.