El Grupu Parlamentariu Popular propunxo esti martes nel Congresu a José Antonio Sánchez como nuevu presidente de RTVE, en sustitución de Leopoldo González Echenique. Los 'populares' presentaron el so candidatu ante'l rexistru de la Cámara Baxa.
Sánchez, hasta agora director xeneral de Telemadrid, va tornar, tres l'aprobación de les Cortes, nel decimonovenu presidente de RTVE de la democracia y nel cuartu que va acceder al cargu col apoyu del Congresu, tres los sos predecesores Luis Fernández, Albert Oliart y Leopoldo González-Echenique.
Cada grupu parlamentariu pudo presentar dende'l pasáu miércoles un solu nome pa dirixir la corporación. La votación realizóse nel Plenu del Congresu. Mientres el periodu d'interinidá, el conseyeru a propuesta del PP José Manuel Peñalosa, ocupó la presidencia en funciones.
Una vez escoyíu'l candidatu, tien que recibir el preste de la comisión de nomamientos de la Cámara Baxa. Dempués, los candidatos van sometese a votación nel Plenu del Congresu. Falta por conocer si'l nomamientu de Sánchez va algamar col apoyu de la oposición, daqué que nun pasó con Echenique.
Nuna primer ronda, va buscase aprobar los nomes por mayoría de dos tercios. En casu de nun llograse, 24 hores dempués podrá celebrase una nueva votación, na que l'aprobación llogróse con mayoría absoluta, polo que'l PP va poder sacar alantre les sos propuestes en solitario.
L'anterior presidente accedió al puestu cola lluz verde del Congresu en segunda vuelta, con 194 votos a favor (de PP y CiU) de los 279 votos emitíos, 74 en blanco y 4 nulos.
Esta designación ye posible n'aprobando'l Gobiernu un decretu llei nel añu 2011 pol que modificaba la forma d'elección del conseyu d'alministración de la radiotelevisión pública, qu'esixía dende'l 2006 (añu en que s'aprobó la llei de reforma de RTVE) el consensu de dos tercios de la Cámara de los Diputaos.
Esti Real Decretu reformaba l'anterior sistema de renovación de RTVE y aprobólu'l Gobiernu coles mires de "desbloquiar" una negociación ente los partíos políticos que nun permitía acordar un nuevu presidente. Esta situación prollongóse nel tiempu casi cerca d'un añu tres la dimisión del anterior dirixente, Albert Oliart.
Antes de l'aprobación del Real Decretu, el dirixente de la corporación tenía que salir escoyíu por dos tercios del Congresu de los Diputaos, esto ye, contar col apoyu de polo menos 248 diputaos, según mandataba la Llei de Radiotelevisión pública estatal del 2006, lo que facía necesario un acuerdu ente PP y PSOE.
