Xixón.-El miércoles viniente, 7 de mayu, fadráse la primera proyección en sala d’El rostru impenetrable
. Comenzará a les 19 hores nel salón d’actos del Centru Municipal Integráu Atenéu La Calzada de
Xixón, dientro del programa de les XIX Xornaes de Llingua y Cultura Asturiana, un eventu entamáu
pola Fundación Municipal de Cultura, Educación y Universidá Popular al traviés del Departamentu
de Proyectos Culturales y la Oficina de Nomalización Llinguística
y los diez colexos públicos del distritu oeste del conceyu.
El rostru impenetrable (ficha técnica) ye un western de 1961 fechu n’Estaos Xuníos d’América, dirixíu y protagonizáu por Marlon Brando, al que tamién acompangaben los actores Karl Malden, Katy Jurado y Pina Pellicer . En1961 tuvo nomináu al Oscar na categoría de Meyor Fotografía (color) y llogró la Concha d’Oru a la meyor película nel Festival de Cine de Donostia.
Dobláu al asturianu por Gonzali Producciones emitiólu la Radiotelevisión del Principáu d’Asturies el 27 d’avientu de 2013 con una cuota de pantalla del 5,1 por cientu, superior a la media de la canal d’esi mes, que s’asitió nun 4,7 por cientu. Esta emisión, al traviés del hashtag #ElRostruImpenetrable, foi ún de los espacios más comentaos na nueche d’esi vienres ente los usuarios de Twitter n’Asturies, xenerando más d’un 80% de comentarios positivos.
Illán Gonzali dirixó y produció’l versionáu, con un repartu de más de venti dobladores, ente ellos Carlos Novoa, José Antonio Lobato, Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán. L'Academia de la Llingua Asturiana foi responsable del asesoramientu lingüsísticu.
El doblaxe d’El Rostru Impenetrable (ONLINE ) ye’l programa más vistu con muncho de ‘TPA a la carta‘, teniendo superao la cifra de 52.000 reproducciones . Ye tamién el títulu que más rápido foi algamando esa posición cimera nel siguimientu per internet.
Más información:
Cine n’asturianu. El rostru impenetrable. XIX Xornaes de llingua y Cultura Asturiana en páxina web del Ayuntamientu Xixón
Xornaes de llingua y cultura tradicional asturiana en páxina web de Cultura y Educación del Ayuntamientu de Xixón
Rellación de Colexos Públicos del distritu oeste de Xixón:
C.P. Atalía, C.P. Eduardo Martínez Torner, C.P. El Lloréu, C.P. Federico García Lorca, C.P. Miguel de Cervantes, C.P. Montiana, C.P. Príncipe de Asturias, C.P. Santa Olaya, C.P. Tremañes, C.P. Xove.
