Ismael González Arias.- Va poco trayía l’exemplu de 10 cantares que cantamos como populares y que son d’autor, y agora fáigolo con 10 tonaes como exmeplu de la bona poesía lítrica qu’atesora la canión asturiana.
Anque namás seya como exemplu p’aquellos que, cuando falen de renovar la tonada asturiana, falen namás de cambiar les lletres: la lletra, cada lletra, representa un mundu, cuenta una hestoria o amuesa un sentimientu.
Estos son 10 exemplos magníficos. Namás 10. Sabiendo qu’hai bien d’ellos más:
01 “Que m’escurez”. Tonada soberana que recueye Eduardo Martínez Torner nel so Cancioneru. Cántala Berto Varillas nel CD “Torner”.
¡Qué m’escurez!
¡Ai, de mi, que m’escurez
a la salida del monte!
¡Lida del monte!
¡Penosina de mipo aldea
dame posada esta noche!
¡Tan escura!
¡Ai, que noche tan escura
que nun tiene movimientu!
¡Movimientu!
¡Ai, quién pudiera tener
tan serenu’l pensamientu!
02 “Caballu al verde”. Tonada soberana que graba Miranda, en 1930, depués de “Esa to boína, majo”
Caballu al verde
una nueche de veranu
eché’l mio caballu al verde
caballu al verde
el caballu se murió
el que tiene ye’l que pierde.
03 “Cantar bien, neña”. Tonada soberana que graba Botón, en 1927, detrás de “Pasé’l puertu de Payares”, Miranda en 1930 y La Busdonga en 1931. Juanín de Mieres tamién la graba en 1931, siguida de “El teléfonu mio novia” y “Dices que con un indianu”
Cantar bien, neña,
si quieres cantar bien, neña,
y tener la voz delgada
la voz delgada,
beberás agua sereno
del ríu Nalón de Pravia.
04 “Carromateros”. Tonada soberana que graba Quin el Pescador en 1929, Juanín de Mieres en 1930 y La Busdonga en 1931.
Carromateros
dicen los carromateros
cuando van al puertu arriba
al puertu arriba:
¡arriba, mula gallarda!
¡arriba, gallarda, arriba!
05 “Me cariciabes”. Tonada soberana ayerana, que tomamos del repertoriu d’Ataulfo Lada Camblor y de Chucha de Nembra.
Me cariciabes
tu pa que me cariciabes
y me dabes tanta gloria
tanta gloria
si m’habíes d’olvidar
ingrata de la memoria.
Dios me daría
para que Dios me daría
tantu amor para querete
para querete
si agora para olvidate
paso les penes de muerte.
Que punxe en ti
el amor que punxe en ti
tan firme y tan verdaderu
tan verdaderu
si lo hubiera puesto en Dios
yá hubiera ganao’l cielu.
06 “Nun puedo subir al puertu”. Tonada que grabó Botón, en 1923, titulándola “Tengo de subir al puertu” y Quin el Pescador, en 1929.
Nun puedo subir al puertu
que ta llueñe la cabana
y el amor tienme prendíu
nel pueblu la Soterraña
Cadena d’amor m’echaron
nun la puedo desatar
porque me tien prisioneru
la morena esti llugar
Ai, si pudiera
comigo la subiría
y pastora la fixera
Nun recuento les oveyes
nin miro pa otres pastores
que l’amor tienme prendíu
nel puertu los mio amores
Ai de mi que ya nun puedo
subir al puertu a curiar
porque me tien prisioneru
la morena esti llugar
Ai, si pudiera
comigo la subiría
y pastora la fixera.
07 “Soi pastor”: Tonada de la tierra que grabara Quin el Pescador, en 1929, Botón, en 1929, siguida de “Yo soi quien curia la oveya” y “Cásate comigo, Pacha”, y Lauro Menéndez, en 1929 y 1931.
Soi pastor, nací nel monte
ente la flor y el ganáu
viva’l pastor
sin tener calor de naide
de nun ser el del ganáu
viva l’amor
08 “¿A ónde vas a dar agua?”. Xirandiya que graba como tonada La Busdonga en 1951, al piano, detrás de “Aquellos gües de quién son”.
¿A ónde va a dar agua,
mozu, a los güeyes,
que siento dende mio cama
los cascabeles?
Si sientes los cascabeles
de mio parexa,
llevántate de la cama
ponte a la rexa.
09 “Anda y señálame un sitiu”: Xota aragonesa que graba como tonada La Busdonga en 1931.
Anda y señálame un sitiu
onde yo me pueda dir
solina llorar mios penes
que contigo cometí.
10 “¿Cómo te va?: Tonada de la tierra que grabó Botón, en 1923. siguida de “Yo nun soi marineru” y “Si vas a la catedral”.
¿Cómo te va
cola pluma de la verde paba?
Bien la pelabes anueche
na to ventana, la paba.
Soi’l galán
atrevíu que ronda la puerta
vengo a dexate una rosa
na to ventana, morena.
FOTO: Cortesía de Luis Santiago
