L’alumnáu del IES Virgen de Covadonga de L’Entregu desenvuelve un proyectu de normalización social del asturianu con autores musicales y lliterarios locales
L’alumnáu de cuartu cursu de la ESO que cursa la materia de Llingua asturiana y Lliteratura nel IES Virgen de Covadonga va desenvolver mañana miércoles, 20 de xunu, dende les 10:30h, la última fase d’un proyectu de normalización social del asturianu que consiste en pintar nes cais de L’Entregu cites d’autores contemporáneos del conceyu.
A lo llargo de tol cursu, l’alumnáu de 4u d’ESO diseñó un plan de fomentu del usu del asturianu col oxetivu de poner en valor el patrimonio lliterariu y musical del conceyu de Samartín del Rei Aurelio. Ente los proyectos que se baraxaron nun primer momento, l’alumnáu prefirió esti porque prestixa a un mesmu tiempo l’usu del idioma y el bon facer de los y les creatives locales.
Nesti cursu escolar, l’alumnáu lleó tola obra de los y les poetes, asina como a los autores musicales contemporáneos del conceyu. D’ente toos ellos, l’alumnáu escoyó les cites más prestoses de Nuberu, La Tarrancha, Xulio Arbesú, Manuel Asur, Chechu García, Vanessa Gutiérrez, Ramón Martín Ardines y Pablo Rodríguez Medina pa decorar les cais de L’Entregu y, al empar, ufrir a la ciudadanía una muestra del gran valir creativu de los y les artistes colos que comparten vecindá.
Otra manera, l’alumnáu, amás de diseñar y executar el proyectu, tamién foi l’encargáu de diseñar una metodoloxía propia de trabayu collaborativu a la hora de desenvolver el llabor, asina como’l cálculu del presupuestu necesariu pa llevar alantre’l proyectu y la correspondiente solicitú d’ayuda económica al Ayuntamientu de Samartín del Rei Aurelio pa los materiales que se precisaron.
Mañana, coincidiendo col fin del cursu escolar, vamos executar la última fase del proyectu y vamos dar por acabáu esti llabor que llevó buena parte del cursu escolar.