Según concreta una providencia del Xulgáu d'Instrucción 2 de Madrid a la que tuvo accesu Europa Press, Puentes ta citada la segunda vez pola presunta comisión de delitos de falsedá documental y estafa procesal por negar qu'estampara la so firma nel acuse de recibu d'una carta fechada en febreru del 2010 y na que Bárcenas solicitaba'l reingresu nel partíu.

   El xuez instructor de la causa ordenó va unos meses una pericial caligráfica pa investigar si la robla del documentu pertenecía o non a la empleada del PP. En recibiendo l'informe policial col resultáu de la dilixencia, vuelve llamar a Puentes pa entrugala.

   Na so denuncia, l'extesoreru aseguraba que la encargada de recursos humanos del PP nun dixo la verdá sobre esti documentu 'clave' qu'apoyaría la so tesis de que la formación despidiólu de forma improcedente.

   El documentu nun se tuvo en cuenta nel xuiciu celebráu por esti despidu, consideráu irregular por Bárcenas, y pol que reclamaba una indemnización de 900.000 euros. La xueza consideró que l'extesoreru nun pidiera formalmente'l so reingresu nel partíu, dempués d'abandonar el Senáu, y refugó los sos pidimientos.

   Bárcenas ostentó'l cargu d'extesoreru hasta marzu del 2010 y defende que siguió trabayando pa la formación hasta xineru del 2013. Mientres esi periodu cobró del PP más de 700.000 euros que, según la so versión, correspuenden al pagu de nómines y, según la de los 'populares', a la indemnización pactada tres la so salida de la formación, que se-y abonó 'en diferío'.