La Fiscalía Anticorrupción de Valencia querellóse contra l'expresidente de la Generalitat Valenciana y diputáu nes Corts Francisco Camps, contra la exconseyera, ex secretaria autonómica de comunicación del Consell y exdirectora de Televisión Valenciana, Lola Jonhson, y l'expilotu Jorge Martínez Aspar por presunta malversación, prevaricación y delitu societariu na compra de la empresa Valmor Sports per parte del Consell n'avientu del 2011 pa poder siguir celebrando'l Gran Premiu d'Europa de Fórmula 1, según confirmaron a Europa Press fontes conocedores del procedimientu.

   El ministeriu públicu presentó la querella contra Camps, Johnson y Aspar ante la sala de lo Civil y Penal del Tribunal Superior de Xusticia de la Comunidá Valenciana (TSJCV) a última hora d'ayeri, por dirixise contra una persona que ye diputada --Camps-- y, por tanto, aforada, colo qu'ésti sería l'organismu competente pa instruyir, nel so casu, la investigación.

   En concreto, el fiscal encargáu de la investigación estima que cola operación de la compra de Valmor pudo incurrise en delitos de malversación de caudales públicos, prevaricación y delitu societariu, colo que se querelló contra Camps, Johnson y Aspar y solicitó que se-yos llame a declarar como imputaos.

   El ministeriu públicu refugó de primeres dirixir la so querella tamién contra'l presidente de la Generalitat, Alberto Fabra, que foi'l que robló la compra de Valmor, al estimar que les supuestes irregularidaes cometiéronse mientres la confección y firma del aval, nun momentu nel que la Presidencia del Consell ocupábase Francisco Camps.

   Asina, les supuestes irregularidaes lléndense a la confección que se fizo dende'l Gobiernu valencianu de Camps pa que la empresa pública Circuitu del Motor y Promoción Deportiva alquiriera la totalidá de les participaciones sociales de Valmor pa entamar l'eventu deportivu por un preciu simbólicu d'un euru --cuando la empresa privada arrastraba una deuda de más de 34 millones d'euros, según la oposición-- y con una cláusula que torgaba esixir responsabilidaes a los empresarios de Valmor.

   Johnson xustificó nel so momentu esta acción en que yera un plan de reorganización del sector públicu que diba peermitir a la Generalitat concentrar la xestión de los eventos deportivos rellacionaos col motor y, asina, poder plantegar d'una forma más eficaz la esternalización parcial de los eventos.

   Sicasí, pa EUPV y PSPV, esta acción supunxo un frayu económicu pal erariu público puesto que una empresa pública de la Generalitat asumió toles deudes d'una empresa privada con entidaes financieres y proveedores, y desabriendo a los vendedores de cualquier responsabilidá.