En Uviéu, alcuéntrase una ilesia, nomada  pola xente carbayona, la Ilesia del Cristu les Cadenes, onde s'arma en Setiembre una romería per guapa.

Esti llugar, tien una lleenda, qu’entá recuerda la xente vieya.

Cuéntase, que fai munchos años, na ciudá vivíen  dos buenes families que teníen unos fíos  per guapos y buenos mozos, Rosaura y Alfonso.

Peto-i al destín qu'ambos rapazos se namorasen, y llueu comenzaren a cortexar col beneplácitu de toos.

Pero un triste díi estalló la Guerra  y Alfonso tuvo qu'allistase a lluchar.

Rosaura atristayá pela partía del so amor entrugó-i cómo podía tener noticies suyes dende'l frente. Entós  el mozu traxo-i un rosal pa que lu plantare nel so xardín diciendo-i:

“Mientres que’l rosal nun de flores, ye que taré bien, pero si muerro, enllenaráse de roses”.

Rosaura miraba tolos  díes el rosal y diba a la Ilesia del Cristu a da-i les gracies per mantener vivu a Alfonso.

Pasaren los años y ella caltenía la esperanza de que'l mozu tornare enteru. Mas tando una vegada rezando-i al Cristu acercóse un home diciendo-i:

“Tráigote males nueves. El to amor cayó prisioneru na batalla, y toos estos años tuvimos los dos  presos . El nun pué tornar pues ta enfermu, mas tráigote les sos cadenes”.

Entós Rosaura desconsolá llevoles al Cristu poniendoles nes manes. Y cuando llegó a casa, el rosal taba cuayáu de roses.

El llugar onde Rosaura vivía , nomase güei, Cai del Rosal.